C'l artìcul chè 'l è scrit in
Miranduléś |
Ignazio Roberto Maria Marino (Gènuva, 10 ad Mars dal 1955), cgnusû méj cuma Ignazio Marino, 'l è 'n cirùśic e pulìtic itagliàṅ dal Partî demucràtic, ex senadōr e sìndig ad Róma.
Da dutōr 'l à fat i prim dū trapiànt ad fégat da babuèṅ a óm in dal 1992 e in dal 1993.
Fiōl 'd un sicigliàṅ e dna śvisra, Marino al và a vìv'r a Róma a quatórd'ś an lasànd la Ligùria in du 'l éra nâ. Da śōvan al fà 'l boy scout e 'l ciàpa 'l diplòma a 'l culéǵ „San Giuseppe de Merode“ di „Fradèi dal scōli cristiàni“. In séguit al s làurea in Madśìna a l'Università Catòlica dla sò sità.
Al và a far al cirùśic in dal Régn Unî (Cambridge) e in di Stat Unî (a Pittsburgh e a Filadèlfia). In dal 1999 al dà vita a 'l prim sèntar p'r i trapiànt ad fégat in Sicìglia a Palèrum. In dla sò caréra mèdaga al 'n à fat da piò ad siesènt-sinquànta in tut.
In dal 2006 al s càndida cuma indipendènt a gl'elesiòṅ e al vèṅ elèt senadōr p'r al Partî demucràtic in dal Lasi, pò al farà àtar tant in dal 2013 in Piemónt. In dal gir ad pôchi stmani al vins al primàri dal sò partî par dvintàr sìndig ad Róma, pò al bat a 'l balutàǵ al sìndig in carga, Gianni Alemanno dal sèntar-dèstra.
In d'l Utóbar dal 2015 al dà 'l dimisiòṅ ma pò al càmbia idéa vlénd armàgnar sìndig ma 'l trénta dal méś vint-siē cunsilēr cumunài i dàn'n al dimisiòṅ a 'l sò pòst e in cla manéra chè lò 'l è custrét a 'ndàr a cà, c'n al prefèt ad Milàṅ Francesco Paolo Tronca ch'al tōś al sò pòst cuma cumisàri.